ચેપોક ખાતે રમાઈ રહેલી મેચમાં પ્રથમ બેટિંગ કરતા રોયલ ચેલેન્જર્સ બેંગ્લોરે ચેન્નાઈ સુપર કિંગ્સને જીતવા માટે 196 રનનો લક્ષ્યાંક આપ્યો છે. આરસીબી તરફથી કેપ્ટન રજત પાટીદારે સૌથી વધુ 51 રન બનાવ્યા. છેલ્લી ઓવરમાં, ટિમ ડેવિડે સતત 3 છગ્ગા ફટકારીને ટીમનો સ્કોર 196 સુધી પહોંચાડ્યો. ચેન્નાઈ સુપર કિંગ્સ તરફથી નૂર અહેમદે સૌથી વધુ વિકેટ લીધી, તેણે વિરાટ કોહલી સહિત કુલ 3 વિકેટ લીધી.
રજત પાટીદારે કેપ્ટનશીપની ઇનિંગ્સ રમી
ફિલ સોલ્ટ અને વિરાટ કોહલીએ ઇનિંગની શરૂઆત કરી. સોલ્ટ આક્રમક રીતે રમી રહ્યો હતો પરંતુ નૂર અહેમદ દ્વારા ફેંકાયેલી 5મી ઓવરના છેલ્લા બોલ પર, એમએસ ધોનીએ તેને બુલેટ સ્પીડથી સ્ટમ્પ આઉટ કર્યો અને પેવેલિયન મોકલી દીધો. સોલ્ટે ૧૬ બોલમાં ૩૨ રન બનાવ્યા, જેમાં તેણે ૧ છગ્ગો અને ૫ ચોગ્ગા ફટકાર્યા.
ત્રીજા નંબરે બેટિંગ કરવા આવેલા દેવદત્ત પડિકલે આક્રમક રમત રમી પરંતુ 8મી ઓવરમાં અશ્વિને તેને આઉટ કર્યો. તેણે ૧૪ બોલમાં ૨ છગ્ગા અને ૨ ચોગ્ગાની મદદથી ૨૭ રન બનાવ્યા. તેણે કોહલી સાથે મળીને બીજી વિકેટ માટે 31 રન જોડ્યા. આ પછી, કોહલીએ કેપ્ટન રજત પાટીદાર સાથે મળીને 41 રનની ભાગીદારી કરી. કોહલી 30 બોલમાં 31 રન બનાવીને આઉટ થયો હતો, તેની વિકેટ નૂર અહેમદે લીધી હતી.
કોહલીના આઉટ થયા પછી, લિયામ લિવિંગસ્ટોન (10) પણ નૂર અહેમદના બોલ પર બોલ્ડ થયો. જીતેશ શર્મા પણ ૧૨ રન બનાવીને આઉટ થયો હતો. જોકે, બીજા છેડે, રજત પાટીદારે સારા શોટ રમ્યા અને મહત્વપૂર્ણ અડધી સદી ફટકારી. તેણે 32 બોલમાં 51 રન બનાવ્યા, આ ઇનિંગમાં તેણે 3 છગ્ગા અને 4 ચોગ્ગા ફટકાર્યા.
ટિમ ડેવિડે છેલ્લી ઓવરમાં 3 છગ્ગા ફટકાર્યા
CSK માટે સેમ કુરનએ ઇનિંગની છેલ્લી ઓવર નાખી, જેમાં તેણે 19 રન આપ્યા. ટિમ ડેવિડે ઓવરમાં સતત 3 છગ્ગા ફટકારીને સ્કોર 196 સુધી પહોંચાડ્યો.
નૂર અહેમદે 3 વિકેટ લીધી
સ્પિનર બોલર નૂર અહેમદે વિરાટ કોહલી સહિત 3 વિકેટ લીધી. તેણે ૧૬મી ઓવરના ત્રીજા બોલ પર લિયામ લિવિંગસ્ટોનને બોલ્ડ આઉટ કર્યો. લિવિંગસ્ટોને પાછલા બોલ પર સિક્સર ફટકારી હતી, જેનો બદલો નૂરે વિકેટ સાથે લીધો હતો. તેણે પોતાની 4 ઓવરમાં 36 રન આપ્યા.
આ સિઝનમાં પોતાની પહેલી મેચ રમી રહેલા મથિશા પથિરાનાએ 4 ઓવરમાં 36 રન આપીને 2 વિકેટ ઝડપી. આમાં રજત પાટીદારની વિકેટનો પણ સમાવેશ થાય છે. ખલીલ અહેમદ અને આર અશ્વિને 1-1 વિકેટ લીધી.
