ઇંગ્લેન્ડ સામેની પાંચ મેચની ટેસ્ટ શ્રેણી શરૂ થાય તે પહેલાં ભારતીય ટીમ માટે રાહતના સમાચાર છે. પારિવારિક કટોકટીને કારણે ભારત પરત ફરેલા મુખ્ય કોચ ગૌતમ ગંભીર મંગળવારે ટીમમાં ફરી જોડાશે. ભારત અને ઇંગ્લેન્ડ વચ્ચેની પહેલી ટેસ્ટ મેચ 20 જૂનથી લીડ્સમાં રમાશે અને તે પહેલાં ગંભીર ફરી એકવાર ટીમમાં જોડાશે.
ગંભીર કાલે રવાના થશે
ગંભીરની માતાને હૃદયરોગનો હુમલો આવતા હોસ્પિટલમાં દાખલ થવું પડ્યું હતું, જેના કારણે ભારતીય મુખ્ય કોચને ઘરે પાછા ફરવું પડ્યું હતું. ભારતીય ક્રિકેટ બોર્ડ (BCCI) ના એક સૂત્રએ સમાચાર એજન્સી PTI ને જણાવ્યું હતું કે, ગંભીરની માતા હવે સ્વસ્થ છે અને તે કાલે રવાના થશે અને તે જ દિવસે ટીમમાં જોડાશે.
ભૂતપૂર્વ ભારતીય ઓપનર બેકેનહામમાં ભારત અને ભારત A વચ્ચે દર્શકો વિના રમાયેલી ઇન્ટ્રા-સ્ક્વોડ મેચમાં ભાગ લીધો ન હતો. તેમની ગેરહાજરીમાં, સહાયક કોચ રાયન ટેન ડોશેટ, બેટિંગ કોચ સિતાંશુ કોટક અને બોલિંગ કોચ મોર્ને મોર્કેલે આ પાંચ મેચની શ્રેણી પહેલા ટીમની તૈયારીઓનું નિરીક્ષણ કર્યું હતું. શુભમન ગિલની આગેવાની હેઠળની ભારતીય ટેસ્ટ ટીમ 2007 પછી ઇંગ્લેન્ડમાં તેની પહેલી શ્રેણી જીતવા માંગે છે.
ભારત માટે રસ્તો સરળ નથી
ભારત A એ ઇંગ્લેન્ડ લાયન્સ સામે બે બિનસત્તાવાર ટેસ્ટ મેચ રમી હતી અને બેટ્સમેનોએ તેમાં પોતાની તાકાત બતાવી હતી. કોઈપણ શ્રેણી પહેલા ટીમની તૈયારી માટે આવી મેચો મહત્વપૂર્ણ છે. ભારતીય ટીમે ખાલી સ્ટેડિયમમાં ઇન્ટ્રા-સ્ક્વોડ મેચ રમવાનું પસંદ કર્યું છે જેથી વિરોધી ટીમને તેમની વ્યૂહરચનાનો ખ્યાલ ન આવે. ગંભીર અને ગિલ માટે ઇંગ્લેન્ડ પ્રવાસ મુશ્કેલ બનવાનો છે. ભારત આ શ્રેણી સાથે વર્લ્ડ ટેસ્ટ ચેમ્પિયનશિપ (WTC) ના નવા ચક્રની શરૂઆત કરશે. ભારતનું ટેસ્ટ પ્રદર્શન છેલ્લા કેટલાક સમયથી સારું રહ્યું નથી અને તેને ન્યૂઝીલેન્ડ અને ઓસ્ટ્રેલિયા સાથેની તેની છેલ્લી ટેસ્ટ શ્રેણીમાં હારનો સામનો કરવો પડ્યો હતો.
